ജീവിതത്തിലെ ആദ്യ അനുഭവം, എങ്ങനെ ധൈര്യമായി ജോലി ചെയ്യും: ഭക്ഷണത്തിലെ പുഴു വിവാദത്തിൽ പഴയിടം

admin October 29, 2026

കോഴിക്കോട്:സംസ്ഥാന സ്കൂൾ കായികമേളയിലെ ഭക്ഷണത്തിൽ പുഴുവിനെ കണ്ടെത്തിയെന്ന ആരോപണം പൂർണ്ണമായും നിഷേധിച്ച് പഴയിടം മോഹനൻ നമ്പൂതിരി.
ഇതിന് പിന്നിൽ കൃത്യമായ അജണ്ടയുണ്ടെന്നും ഇത് തന്റെ ജീവിതത്തിലെ ആദ്യ അനുഭവമാണെന്നും പഴയിടം പറഞ്ഞു.

“കലോത്സവ ചരിത്രത്തിൽ കൂടി ആദ്യമാണിത്. ഇത്രയും ഹീനമായ രീതിയിൽ പ്രവർത്തിക്കണമെങ്കിൽ എന്തൊക്കെ മാനസിക വൈകൃതമുള്ളയാളാവണം. ഇതിന്റെ പിന്നിൽ കൃത്യമായ അജണ്ടയുണ്ട്. അത് പുറത്തുവരണം. ഇത്തരമൊരു സംഭവം ഉണ്ടാകില്ലെന്ന് ഉറപ്പാണ്,” പഴയിടം മോഹനൻ നമ്പൂതിരി പറഞ്ഞു.

ആദ്യദിവസത്തെ വാർത്ത കണ്ടപ്പോൾ തന്നെ ഭക്ഷണ കമ്മിറ്റി കൺവീനറോട് സംസാരിച്ചിരുന്നുവെന്നും ആരോപണം വ്യാജമാണെന്നും ഇതിനെക്കുറിച്ച് അന്വേഷിക്കണമെന്നായിരുന്നു ആവശ്യമെന്നും പഴയിടം വ്യക്തമാക്കി.

“ഏതൊരു പാചകക്കാരനും എത്രമാത്രം ഭീതിയോടെയാകും ഓരോ കലോത്സവങ്ങൾക്കും പാചകം ചെയ്യുക. കേരളത്തിലെ മേളകൾ തുടങ്ങിയതേയുള്ളൂ. ഏതെല്ലാം മേളകൾ വരാൻ കിടക്കുന്നു. എങ്ങനെ ധൈര്യമായി ജോലി ചെയ്യാൻ പറ്റും. ഇപ്പോൾ പുഴുവിട്ടയാൾ മറ്റെന്തെങ്കിലും ചെയ്യില്ലെന്ന് എന്താണ് ഉറപ്പ്. അന്വേഷിച്ച് പിന്നിലെ ശക്തികളെ കണ്ടെത്തണം. മാതൃകാപരമായി ശിക്ഷിക്കണം. കായികമേള മൂന്ന് ദിവസം കൂടിയുണ്ട്. സുരക്ഷ ശക്തമാക്കാൻ ആവശ്യപ്പെട്ടിട്ടുണ്ട്,” എന്നും പഴയിടം പറഞ്ഞു.