കൊല്ലത്ത് സ്ത്രീധന പീഡനം: നവവധുവിന് ഭർത്താവിന്റെ ക്രൂരമർദ്ദനം, കേസെടുത്ത് പൊലീസ്

admin October 4, 2026

കൊല്ലം: സ്ത്രീധനവുമായി ബന്ധപ്പെട്ട് നവവധുവിന് ഭർത്താവിന്റെ ക്രൂരമർദ്ദനം. കുക്കറും, ലാപ്ടോപ്പും, മൊബൈൽ ചാർജറും ഉൾപ്പെടെ ഉപയോഗിച്ച് മർദ്ദിച്ചെന്ന് പുത്തൻതുറ സ്വദേശി അഞ്ജുവിന്റെ പരാതി. ശരീരത്തിൽ ക്രൂരമായി മർദ്ദനമേറ്റതിന്റെ പാടുകൾ. പെൺകുട്ടിയുടെ പരാതിയിൽ ഭർത്താവ് നന്ദു, ഭർതൃപിതാവ് ദിനേശ്, ഭർതൃമാതാവ് ജഗദമ്മ എന്നിവരെ പ്രതി ചേർത്ത് പൊലീസ് കേസെടുത്തു.

ഇക്കഴിഞ്ഞ ജൂൺ മാസം 27 നായിരുന്നു കൊല്ലം പുത്തൻ തുറ സ്വദേശിനി അഞ്ജുവിന്റെയും ചവറ സ്വദേശി നന്ദുവിന്റെയും വിവാഹം. ഒരാഴ്ച തികയും മുൻപ് സ്ത്രീധനത്തിന്റെ പേരിൽ ചോദ്യങ്ങളുണ്ടായെന്ന് യുവതി. പിന്നീട് പ്രശ്നങ്ങൾ പരിഹരിച്ച് സൗദിയിലേക്ക് മടങ്ങിയ ഭർത്താവിന്റെ അടുത്തേക്ക് അഞ്ജു പോയി. വിദേശത്ത് വെച്ചും അതിക്രൂരമർദ്ദനം.

സെപ്റ്റംബർ 30ന് നാട്ടിൽ മടങ്ങിയെത്തിയ അഞ്ജു ചവറ പോലീസിന് പരാതി നൽകി, പരാതിയിൽ ഭർത്താവ് നന്ദു, അച്ഛൻ ദിനേശ്, അമ്മ ജഗദമ്മ എന്നിവർക്കെതിരെ കേസെടുത്തിട്ടുണ്ട്.സംഭവത്തിൽ കർശന നടപടിയെന്ന് മന്ത്രി ബിന്ദു കൃഷ്ണ പറഞ്ഞു. ഞെട്ടിപ്പിക്കുന്ന സംഭവമെന്ന് ഡിവൈഎഫ്ഐ സംസ്ഥാന പ്രസിഡന്റ് ചിന്താ ജെറോം പ്രതികരിച്ചു. മർദ്ദനത്തിൽ ഗുരുതരമായി പരിക്കേറ്റ അഞ്ജു കൊല്ലം ജില്ലാ ആശുപത്രിയിൽ ചികിത്സയിലാണ്.