കോട്ടയം കുമാരനല്ലൂരിൽ വീട്ടിൽ നിന്നും കാണാതായ യുവതിയെ മീനച്ചിലാറിന്റെ കൈവഴിയിൽ മരിച്ച നിലയിൽ കണ്ടെത്തി
കോട്ടയം: ആലപ്പുഴയിലെ സുഹൃത്തിനെ കടലിൽ വീണ് കാണാതായതിനു പിന്നാലെ മനോവിഷമത്തിലായതിനെ തുടർന്ന് വീട്ടിൽ നിന്നും കാണാതായ യുവതിയെ മരിച്ച നിലയിൽ കണ്ടെത്തി. ഇന്നലെ വൈകിട്ടോടെ വീട്ടിൽ നിന്നും കാണാതായ യുവതിയെയാണ് മീനച്ചിലാറിന്റെ കൈവഴിയിൽ മരിച്ച നിലയിൽ കണ്ടെത്തിയത്. കുമാരനല്ലൂർ കടവിൽ നിമിഷ ഷാജിയെ(26)യാണ് മരിച്ച നിലയിൽ കണ്ടെത്തിയത്.
ഇന്നലെ വൈകിട്ടോടെയാണ് നിമിഷയെ വീട്ടിൽ നിന്നും കാണാതായത്. തുടർന്ന്, ബന്ധുക്കൾ ഗാന്ധിനഗർ പൊലീസിൽ പരാതി നൽകിയിരുന്നു. പരാതിയുടെ അടിസ്ഥാനത്തിൽ പൊലീസ് സംഘം അന്വേഷണം നടത്തുകയായിരുന്നു. അന്വേഷണത്തിനിടെയാണ് ഇന്നു രാവിലെ ഏഴു മണിയോടെ യുവതിയുടെ മൃതദേഹം കുമാരനല്ലൂർ വടക്കേ നടയ്ക്ക് സമീപം മീനച്ചിലാറിന്റെ കൈവഴിയിൽ കണ്ടെത്തിയത്. തുടർന്ന്, കോട്ടയത്ത് നിന്നുള്ള അഗ്നിരക്ഷാ സേനാ സംഘം സ്ഥലത്ത് എത്തി മൃതദേഹം പുറത്ത് എത്തിച്ചു. തുടർന്ന്, മൃതദേഹം കോട്ടയം മെഡിക്കൽ കോളേജ് ആശുപത്രിയിലേയ്ക്കു മാറ്റി.
നിമിഷയുടെ സുഹൃത്തായ ആലപ്പുഴ സ്വദേശിയെ കഴിഞ്ഞ ദിവസം ആലപ്പുഴയിൽ കടലിൽ വീണ് കാണാതായിരുന്നു. ഇതിന്റെ മനോവിഷമത്തിലായിരുന്നു നിമിഷയെന്ന് ഗാന്ധിനഗർ പൊലീസ് പറഞ്ഞു. ഇതേ തുടർന്നാണ് നിമിഷയെയും കാണാതായതെന്നാണ് ബന്ധുക്കൾ പൊലീസിൽ പരാതി നൽകിയത്. സംഭവത്തിൽ ഗാന്ധിനഗർ പൊലീസ് കേസെടുത്ത് അന്വേഷണം ആരംഭിച്ചു.
Tags:
Share:
Related Post
