അഭിപ്രായം പ്രസ് കോണ്‍ഫറന്‍സിലൂടെയല്ല പറയേണ്ടത്; അടൂര്‍ പ്രകാശിനെ തള്ളി എം എം ഹസ്സന്‍
തിരുവനന്തപുരം: യുഡിഎഫ് കണ്‍വീനര്‍ അടൂര്‍ പ്രകാശിനെ തള്ളി എം എം ഹസ്സന്‍. അടൂര്‍ പ്രകാശ് അദ്ദേഹത്തിന്റെ അഭിപ്രായങ്ങള്‍ പ്രസ് കോണ്‍ഫറന്‍സിലൂടെയാണ് പറഞ്ഞത്. അഭിപ്രായം പ്രസ് കോണ്‍ഫറന്‍സ് വഴിയല്ല പറയേണ്ടത്. പാർട്ടിക്ക് അകത്താണ്. ഉന്നയിച്ച വിഷയത്തില്‍ ഹൈക്കമാന്റ് പരിഹാരം ഉണ്ടാക്കുമെന്നും ഹസ്സന്‍ പറഞ്ഞു.
അദ്ദേഹത്തിനോട് ഒന്നും ആലോചിക്കുന്നില്ലെങ്കില്‍ അത് പറയേണ്ടത് ഹൈക്കമാന്റിനോട് ആണ്. അത് പറഞ്ഞു. അത് അവിടെ നിര്‍ത്തണം. വീണ്ടും വീണ്ടും പറയുന്നത് പാര്‍ട്ടിക്കും മുന്നണിക്കും ഗുണകരമല്ലെന്നും ഹസ്സന്‍ വ്യക്തമാക്കി. സിഎംആര്‍എല്‍-എക്‌സാലോജിക് വിഷയത്തില്‍ നിയമോപദേശം തേടിയ ശേഷമാണ് സര്‍ക്കാര്‍ മുന്നോട്ടുപോയത്. മുന്‍ മുഖ്യമന്ത്രിക്കെതിരായ രാഷ്ട്രീയപകപോക്കല്‍ ആയല്ല നിലവിലെ കേസ് നടപടികളെ കാണേണ്ടത്. കോടതി ഉത്തരവിനെ തുടര്‍ന്നാണ് കേസ് എന്നും എം എം ഹസ്സന്‍ പറഞ്ഞു.
ആണുങ്ങളുടെ സര്‍ക്കാര്‍ പരാമര്‍ശത്തില്‍ കെ സുധാകരനെ ഹസ്സന്‍ തിരുത്തി. അത്തരം പ്രയോഗങ്ങള്‍ നല്ലതല്ലെന്നും സ്ത്രീകളും പുരുഷന്മാരും അടങ്ങുന്നതാണ് ഈ സര്‍ക്കാര്‍ എന്നും ഹസ്സന്‍ വ്യക്തമാക്കി. മുഖ്യമന്ത്രി വി ഡി സതീശനെ ഉള്‍പ്പെടെ ലക്ഷ്യം വെച്ചുള്ള അടൂര്‍ പ്രകാശിന്റെ പ്രതികരണങ്ങള്‍ പാര്‍ട്ടിക്ക് തലവേദനയായിരുന്നു. എന്നാല്‍ അടൂര്‍ പ്രകാശ് തുടര്‍ച്ചയായി ഉന്നയിച്ച വിമര്‍ശനങ്ങള്‍ അവഗണിക്കാന്‍ കഴിയില്ലെന്നാണ് ഒരു വിഭാഗം നേതാക്കളുടെ നിലപാട്.
Tags:
Share:
Related Post
