വ്യാജ കസ്റ്റമർ കെയർ നമ്പറുകൾ ഉപയോഗിച്ച് സൈബർ സാമ്പത്തിക തട്ടിപ്പ്; ജാഗ്രത പാലിക്കണമെന്ന് പൊലീസ്
തിരുവനന്തപുരം: സൈബര്‍ സാമ്പത്തിക തട്ടിപ്പുകളില്‍ ജാഗ്രത പാലിക്കണമെന്ന മുന്നറിയിപ്പുമായി കേരള പൊലീസ്. ഇന്റര്‍നെറ്റില്‍ തിരയുന്ന കസ്റ്റമര്‍ കെയര്‍ നമ്പറുകള്‍ വഴി പണവും വ്യക്തിഗത വിവരങ്ങളും ചോരുന്ന തട്ടിപ്പുകള്‍ വര്‍ധിക്കുന്നുവെന്നും ബാങ്കുകള്‍, ഇ-കോമേഴ്സ് പ്ലാറ്റ്‌ഫോമുകള്‍ തുടങ്ങിയ വിവിധ സ്ഥാപനങ്ങളുടെ പേരില്‍ തട്ടിപ്പുകാര്‍ ഇന്റര്‍നെറ്റില്‍ വ്യാജ നമ്പറുകള്‍ പോസ്റ്റ് ചെയ്താണ് ഉപഭോക്താക്കളെ വലയിലാക്കുന്നതെന്നും പൊലീസ് പ്രസ്താവനയില്‍ വ്യക്തമാക്കി.
സഹായത്തിനായി ഉപഭോക്താക്കള്‍ ഈ നമ്പറുകളിലേക്ക് വിളിക്കുമ്പോള്‍ നേരിട്ട് കണക്റ്റാകില്ല. തുടര്‍ന്ന് കസ്റ്റമര്‍ സപ്പോര്‍ട്ട് ഏജന്റാണെന്ന വ്യാജേന തട്ടിപ്പുകാര്‍ തിരികെ വിളിക്കുകയാണ് ചെയ്യുന്നത്. പരാതി പരിഹരിക്കാനെന്ന പേരില്‍ ഫോണില്‍ റിമോട്ട് ആക്സസ് അല്ലെങ്കില്‍ സ്‌ക്രീന്‍ ഷെയറിംഗ് ആപ്പുകള്‍ ഇന്‍സ്റ്റാള്‍ ചെയ്യാന്‍ ആവശ്യപ്പെടും. തുടര്‍ന്ന് രജിസ്ട്രേഷന് ഫീസെന്നോ വെരിഫിക്കേഷന്‍ ഫീസെന്നോ പറഞ്ഞ് അഞ്ചുരൂപ പോലെയുള്ള ചെറിയ തുക അടയ്ക്കാന്‍ നിര്‍ദ്ദേശിക്കും. ഇതിലൂടെ ബാങ്കിംഗ് വിവരങ്ങളും വ്യക്തിഗത വിവരങ്ങളും ചോര്‍ത്തി വന്‍ സാമ്പത്തിക തട്ടിപ്പാണ് ഇവര്‍ നടത്തുന്നത്. ഗൂഗിളില്‍ തിരയുമ്പോള്‍ ലഭിക്കുന്ന കസ്റ്റമര്‍ കെയര്‍ നമ്പറുകള്‍ പൂര്‍ണ്ണമായി വിശ്വസിക്കരുതെന്നും മുന്നറിയിപ്പില്‍ വ്യക്തമാക്കുന്നു.
ഏതൊരു സേവനത്തിനും സ്ഥാപനങ്ങളുടെ ഔദ്യോഗിക വെബ്സൈറ്റോ ആപ്പോ മാത്രം ഉപയോഗിക്കണമെന്നും അജ്ഞാതരുടെ ആവശ്യപ്രകാരം യാതൊരു കാരണവശാലും റിമോട്ട് ആക്സസ് ആപ്പുകള്‍ ഫോണില്‍ ഇന്‍സ്റ്റാള്‍ ചെയ്യുകയോ രജിസ്ട്രേഷന് ഫീസുകള്‍ നല്‍കുകയോ ചെയ്യരുതെന്നും പൊലീസ് നിര്‍ദ്ദേശിച്ചു. ഒടിപി, പിന്‍, പാസ്‌വേര്‍ഡ്‌, കാര്‍ഡ് വിവരങ്ങള്‍ തുടങ്ങിയവ ആരുമായും പങ്കുവെക്കരുത്. ഫോണ്‍ സംഭാഷണത്തിനിടെ എന്തെങ്കിലും സംശയം തോന്നിയാല്‍ ഉടന്‍ കോള്‍ അവസാനിപ്പിക്കണം.
ഏതെങ്കിലും തരത്തിലുള്ള സൈബര്‍ സാമ്പത്തിക തട്ടിപ്പിനിരയായാല്‍ ഉടന്‍തന്നെ 1930 എന്ന സൈബര്‍ ഹെല്‍പ് ലൈന്‍ നമ്പറിലോ www.cybercrime.gov.in എന്ന ദേശീയ സൈബര്‍ ക്രൈം പോര്‍ട്ടല്‍ വഴിയോ പരാതി നല്‍കേണ്ടതാണെന്നും നിര്‍ദ്ദേശിക്കുന്നു.
Tags:
Share:
Related Post
