ചൊക്രമുടിയിലെ നീലവസന്തത്തിന് വിട; ഇനി 12 വർഷങ്ങൾക്ക് ശേഷം; വിരുന്നെത്തിയത് അരലക്ഷത്തിലേറെ സഞ്ചാരികൾ

admin October 12, 2026

മൂന്നാർ: ഒരു വ്യാഴവട്ടക്കാലത്തെ നീണ്ട കാത്തിരിപ്പിനൊടുവിൽ മൂന്നാറിലെ ചൊക്രമുടി മലനിരകളെ നീലപ്പട്ടണിയിച്ച നീലക്കുറിഞ്ഞി പൂക്കാലത്തിന് വിട. ചൊക്രമുടിക്ക് പുറമെ കൊരണ്ടികാട്, ചിന്നക്കനാൽ അറുപതേക്കർ മേഖലകളിലായിരുന്നു ഇത്തവണ കുറിഞ്ഞി വ്യാപകമായി പൂവിട്ടത്. 48 ദിവസങ്ങളോളം നീണ്ടുനിന്ന മനോഹരമായ ഈ നീലവസന്തം കാണാൻ അരലക്ഷത്തിലധികം സഞ്ചാരികളാണ് രാജ്യത്തിന്റെ വിവിധ ഭാഗങ്ങളിൽ നിന്നായി മലകയറിയെത്തിയത്. കഴിഞ്ഞ ദിവസങ്ങളിൽ മേഖലയിൽ പെയ്ത കനത്ത മഴ പൂക്കൾ കൊഴിയുന്നതിനും നശിക്കുന്നതിനും ഇടയാക്കിയതോടെയാണ് സീസണ് ഔദ്യോഗികമായി തിരശ്ശീല വീണത്.

നിലവിൽ മലനിരകളിൽ നാമമാത്രമായ പൂക്കൾ മാത്രമാണ് അവശേഷിക്കുന്നത്. ഔദ്യോഗിക സീസൺ അവസാനിച്ചെങ്കിലും അവശേഷിക്കുന്ന പൂക്കൾ കാണാൻ എത്തുന്ന സഞ്ചാരികൾക്ക് മലകയറാനുള്ള പ്രവേശന സൗകര്യം തുടർന്നും നൽകുമെന്ന് വനംവകുപ്പ് അധികൃതർ അറിയിച്ചു. കുറിഞ്ഞി സീസൺ വനംവകുപ്പിന് മികച്ച വരുമാനവും നേടിക്കൊടുത്തു. കുട്ടികൾക്ക് നൂറ് രൂപയും മുതിർന്നവർക്ക് ഇരുന്നൂറ് രൂപയുമായിരുന്നു സന്ദർശന ഫീസായി നിശ്ചയിച്ചിരുന്നത്. പ്രവേശന ഫീസ് ഇനത്തിൽ മാത്രം ആകെ 75 ലക്ഷത്തോളം രൂപയുടെ വരുമാനമാണ് വനംവകുപ്പ് സമാഹരിച്ചത്.

മുൻ വർഷങ്ങളിൽ ശാന്തൻപാറ കള്ളിപ്പാറയിലും പൂപ്പാറ തോണ്ടിമലയിലുമായിരുന്നു നീലക്കുറിഞ്ഞി വ്യാപകമായി പൂവിട്ടിരുന്നത്. അതേസമയം, മൂന്നാറിലെ ഏറ്റവും പ്രധാനപ്പെട്ടതും വിപുലവുമായ കുറിഞ്ഞി പൂക്കാലത്തിനായി ഇനി നാല് വർഷം കൂടി കാത്തിരിക്കണം. നാല് വർഷങ്ങൾക്ക് ശേഷം ഇരവികുളം ദേശീയോദ്യാനത്തിലും വട്ടവട മേഖലയിലുമാണ് കുറിഞ്ഞി പൂക്കുക. ചൊക്രമുടിയിൽ ഇനി വിസ്മയക്കാഴ്ചയൊരുങ്ങാൻ മറ്റൊരു 12 വർഷക്കാലം കൂടി കാത്തിരിക്കേണ്ടിവരും.