‘ചികിത്സാ പിഴവിനെ തുടര്ന്ന് വലതുകൈ നഷ്ടപ്പെട്ട വിനോദിനിക്ക് ഭാവിയില് സര്ക്കാര് ജോലി നല്കണം’; ശിപാര്ശ ചെയ്ത് ബാലാവകാശ കമ്മീഷന്
പാലക്കാട്: ചികിത്സാ പിഴവിനെ തുടര്ന്ന് വലതുകൈ നഷ്ടപ്പെട്ട, പാലക്കാട് പല്ലശന സ്വദേശിയായ ഒന്പതു വയസുകാരി വിനോദിനിക്ക് ഭാവിയില് സര്ക്കാര് ജോലി നല്കണമെന്ന് ബാലാവകാശ കമ്മീഷന്. കൈ നഷ്ടപ്പെടാന് കാരണം സര്ക്കാര് സംവിധാനങ്ങളുടെ വീഴ്ചയാണെന്നാണ് വിലയിരുത്തല്. ചെയര്പേഴ്സണ് കെ.വി മനോജ്കുമാര് ഉള്പ്പെടെയുള്ള ഡിവിഷന് ബെഞ്ചിന്റെതാണ് ശിപാര്ശ.
സര്ക്കാര് ഏറ്റെടുത്തിട്ടുള്ള തുടര്പഠന ചെലവ് 21 വയസുവരെ ലഭിക്കുന്നുവെന്ന് പാലക്കാട് ജില്ല ശിശു സംരക്ഷണ ഓഫീസര് ഉറപ്പാക്കണമെന്നും കമ്മീഷന് നിര്ദേശിച്ചു.
വിനോദിനിയുടെ ചികിത്സാ- വിദ്യാഭ്യാസ ചിലവുകള് സര്ക്കാര് വഹിക്കണമെന്ന് ഹൈക്കോടതി നേരത്തെ നിര്ദേശിച്ചിരുന്നു. 21 വയസ് വരെ ചിലവ് വഹിക്കണമെന്നാണ് കോടതി ഉത്തരവ്. കൈ നഷ്ടപ്പെട്ടത് വിനോദിനിക്ക് ഭാവിയില് ജോലി കിട്ടുന്നതിന് തടസമാകരുത് ഇക്കാര്യം സര്ക്കാര് ഉറപ്പാക്കണമെന്നും കുറ്റക്കാരായവര്ക്കെതിരെ നിയമാനുസൃതം നടപടി സ്വീകരിക്കണമെന്നും ഹൈക്കോടതി വ്യക്തമാക്കി.
കഴിഞ്ഞ വര്ഷം സെപ്തംബര് 24ന് സഹോദരനൊപ്പം കളിക്കുന്നതിനിടെ വീണാണ് വിനോദിനിയുടെ കൈയ്ക്ക് പരുക്കേറ്റത്. പാലക്കാട് ജില്ലാ ആശുപത്രിയിലെ ചികിത്സയ്ക്കുശേഷം കൈയില് നീര്ക്കെട്ട് ഉണ്ടായതോടെ കുട്ടിയെ കോഴിക്കോട് മെഡിക്കല് കോളജ് ആശുപത്രിയിലേക്ക് മാറ്റിയിരുന്നു. ഇവിടെ നടത്തിയ പരിശോധനയിലാണ് കൈ മുറിച്ചു മാറ്റേണ്ടിവന്നത്.അന്നത്തെ സംഭവത്തില് രണ്ട് ഡോക്ടര്മാരെ സസ്പെന്ഡ് ചെയ്തതിനപ്പുറം പിന്നീട് ഒരു നടപടിയും ഉണ്ടായിട്ടില്ല. പണം കടംവാങ്ങിയാണ് വിനോദിനിയുടെ രക്ഷിതാക്കള് ചികിത്സ നടത്തിയത്.
Tags:
Share:
Related Post
